Veç veprimtarive tradicionale që POETEKA ka ofruar përherë për ata që e kanë ndjekur, këtë vit do të ketë edhe disa hapësira të reja jo vetëm për poetët por edhe për artet e tjera të cilat e kanë shoqëruar përherë poezinë, por edhe ka kërkuar edhe mënyra të reja të komunikimit mes arteve. Kështu për shembull POETEKA do të ofrojë hapësirë për:

Filmin - etyd - si një mundësi që rrit perceptimin viziv të poezisë përmes gjuhës filmike. Poezi të disa autorëve do të realizohen si version filmik përmes imazhit filmik.

Muzikën  - Është përzgjedhur krijimtaria e disa autorëve, e cila do të vijë në Poeteka në format kënge, romance, balade, ku veç përveç përftimit të ndjesisë artistike nga bashkëjetesa e dy arteve, do të ngulmohet edhe një lëvizje ndaj një problemi të artit muzikor shqiptar; përdorimit të teksteve vulgare për këngë, duke ofruar modele si si tekste të mirëfillta poetike shndërrohen në këngë.

Përkthimin poetik - Duetet poet-përkthyes do të jenë paraqitje të veprës dhe vlerës artistike të saj në këndvështrimin e përbashkët. Gjithashtu kjo do të ofrojë edhe debat mbi një nga problematikat e letërsisë shqipe sot - mbetjen vetëm në njërën anë të kufirit si dhe ofrimin e disa modeleve, tashmë shkollë, jo vetëm me atë që ofron shkolla tradicionale e përkthimit por edhe prurjet e përkthyesve të rinj.

Euroteka – që do të zhvillohet në Berat – do të ofrojë veprimtari në kuadër të Javës së kulturës evropiane si ekspozita, lexime poetike në vende të artit dhe kulturës, të cilat janë të rrezikuara e që duhen marrë në mbrojtje etj.

Poem-SMS  - Dimension tjetër për POETEKA III do të jetë dhe shpërndarja e poezisë përmes mesazheve SMS. Një ditë gjatë festivalit vargjet poetike të pjesëmarrësve do të përcillen tek publiku duke synuar rritjen e vëmendjes ndaj këtij zhanri të kërcënuar nga mosleximi.