Ideja qendrore e gjithë Festivalit është krijimi jo thjesht i një ngjarjeje për poetët dhe poezinë, por ruajtjen e asaj klime të veçantë të krijuar në dy edicionet e parë poetike. Ajo që në krye ishte synim për organizatorët dhe pjesëmarrësit, pra që Shqipëria të shënohet në “hartën poetike” të Evropës përmes krijuesve dhe krijimtarisë së tyre, tashmë ishte arritur. Veç të shohësh numrin e vendeve pjesëmarrëse që vjen përherë në rritje, programin dhe elementët e shumtë, u jep të drejtë atyre që e kanë çmuar lart këtë veprimtari dhe fillon të besosh se gjithmonë ka vend për të bërë diçka në vend që të lidhësh duart e ndonëse me shumë vështirësi po krijohen hapësira për të jetuar me njëri-tjetrin, cilësisht më mirë.

POETEKA III do të zhvillohet sërish në Durrës ( 30 prill – 5 maj 2007) për arsyen se ky qytet, falë vlerave kulturore, historike, muzeore, natyrore dhe turistike e qytetare që mbart, plotëson më së miri sfondin artistik të domosdoshëm për veprimtari të këtilla. Durrësi meriton të “rizbulohet” jo vetëm nga të huajt që bujtin aty, por edhe nga vetë shqiptarët, të cilët shpesh kur mbërrijnë në rrethrrotullimin e autostradës, presin majtas, drejt Plazhit, duke lënë mënjanë monumentet dhe vlerat e një qytetërimi e qytetarie që ka dhënë shumë pa pritur të marrë. Në këtë pikë njeriu mund të bëjë edhe një pyetje tjetër: pse POETEKA zgjedh atëherë një qytet të veçuar, kur vetë veprimtaria nuk është e këtillë? Pse “i shmanget” metropolit kulturor? Pikërisht këtu duhet theksuar fakti se së paku prej disa vitesh Durrësi, qetë dhe pa shungullim, ka marrë tiparet e një qendre tjetër kulturore, ka zhvendosur një pikë të artit nga Tirana. Mjafton të kujtojmë se në harkun e një viti aty zhvillohen 3 veprimtari të rëndësishme të përmasës ndërkombëtare si Festivali Dance Miting, Festivali i Jazz-t dhe Poeteka. Por të gjitha këto mbështillen nga dhjetra veprimtari, ekspozita, koncerte që ndodhin shpesh në Bibliotekë, në galerinë “Jozef” apo në qendrën më të re të artit që do përurohet këto ditë – Isamnus.

Ftesa edhe këtë herë është e hapur, publike, për të gjithë. Nga data 30 prill deri me 5 maj poetë të njohur nga vendi dhe bota, por edhe poetët më të rinj, të ftuar në POETEKA III do të përfaqësojnë  krijimtarinë e tyre. Ky edicion do të ketë 19 shtete – duke përfshirë edhe Shqipërinë e Kosovën -  që do të marrin pjesë poetikisht në POETEKA 3. E thënë në tjetër mënyrë do të ishte: ato gjashtë ditë të festivalit do të dëgjojmë të flitet në 19 gjuhë për të bukurën, estetiken, të paqmen. Ky mund të jetë edhe një gjë që rrit kërshërinë. Por për poetët ky fakt tingëllon ndryshe. Poezia do të flasë në 19 gjuhë. Kjo do të thotë se secili e ka një mundësi më shumë për të vendosur drejtpërsëdrejti me 19 kultura. Gjithkush mund të provojë shansin të përkthehet në 19 gjuhët që do të kenë “përfaqësuesit poetikë” në festival. Secili ka 19 mundësi edhe për t’u botuar në organet e shtypit letrar apo shtëpitë botuese të njëri-tjetrit. Secili mund të marrë ftesa për të qenë i pranishëm në ngjarjet kulturore e artistike të njëri-tjetrit. Secili mund të krijojë miqësi personale e të “integrohet në Evropë” më shpejt se ç’parashikohet. Pra janë 19 mundësi. Për poezinë, për poetët, për qytetin dhe për Shqipërinë. Kjo është kartëvizita e këtij edicioni të tretë të Poetekës që nis nga Durrësi për të shtegtuar në stacione të tjera të traditës dhe më të resë poetike - Berati, Shkodra e Tirana.