Poeteka 2007

Nga shtatori deri në dhjetor 2004, POETEKA zhvilloi 13 takime me pjesëmarrjen e 21 poetëve më të shquar shqiptarë e 4 poetëve e eseistëve të huaj që nga Claudio Pozzani, Ferid Muhiq, Eliot Wainberger e Maria Castellana. Kjo përvojë çeli rrugën e themelimit të Festivalit të Parë Ndërkombëtar të Poezisë – POETEKA, i cili më shumë se një veprimtari rutinë ku poetët mblidhen një herë në vit për t’i lexuar sho-shoqit krijimtarinë e tyre, ngulmoi të jetë një lëvizje shpirtërore. Ishte lëshuar në erë një ftesë së cilës që në Festivalin POETEKA I (27 prill – 3 maj 2005) iu përgjigjën 50 poetë të ardhur nga Shqipëria, Greqia, Italia, Portugalia, Sllovenia, Rumania, Bullgaria, Bosnja, Kroacia, Maqedonia, Kosova dhe Mali i Zi. Kështu nisi rrugën ky festival, i cili e krijoi fizionominë me të gjithë elementët e vet që nga çmimi tepër i veçantë i fituesit, Unaza Poeteka, ashtu edhe me formatin e veprimtarive, dimensionin e zbulimit të vlerave dhe bukurive të strukura të qytetit, shtegtimet poetike në qytete të tjera të Shqipërisë apo me dhuratat poetike që festivali ofron për miqtë e vet, dhurata që të çojnë në kohëra të largëta. Mirënjohja është një ndjesi afatgjatë dhe krahas kontributit të vyer që dhanë vetë poetët për poezinë, nuk duhet harruar kurrsesi përkrahja që i kanë dhënë përherë Poetekës Ministria e Turizmit, Kulturës, Rinisë dhe Sporteve, Bashkia Durrës, Prefektura Berat apo Kantina e Pijeve Gjergj Kastrioti të cilët bashkë me mbështetjen e TV Alsat, TV Koha apo TV Teuta përkrahën bujarisht dhe bënë shumëfishimin e vlerave të kësaj veprimtarie. POETEKA I pati fituese të unazës kroaten Sibila Petlevski dhe poetin Ali Podrimja. POETEKA II (26 prill – 2 maj 2006) solli zgjerim të formatit të vet, pasi veç ruajtjes së elementëve më të mirë të parë, i zgjeroi dimensionet e veta duke bërë të mundur që brenda një jave, festivali të shtegtojë edhe në 3 qendra të rëndësishme të kulturës dhe qytetërimit shqiptar (Apoloni, Berat, Shkodër) duke i dhënë kështu karakter më të hapur Festivalit dhe nga ana tjetër, një mundësi më shumë për poetët që jetojnë larg qendrave të mëdha urbane. Fitues i POETEKA II ishin poetja e shquar italiane Maria Luisa Spaziani dhe poetja ruse Olga Sedakova e Xhevahir Spahiu.